Con respecto ao tema 6: Metodoloxías CLIL/AICLE (Aprendizaxe Integrada de
Contidos e Lingua Estranxeira), vou facer un pequeno comentario sobre as ideas
que xurdiron do debate na clase sobre o plan da Xunta de Galicia EDUlingüe que
intenta integrar esta metodoloxía. Este proxecto consiste en estender o
plurilingüismo por toda Galicia dende a etapa infantil até a universidade
afectando tamén ao profesorado. Esta iniciativa pretende alcanzar os seus
obxectivos no ano 2020 cunha inversión de 70 millóns de euros.
A Xunta quere conseguir 500 centros plurilingües, 600 seccións bilingües
novas, o dobre de auxiliares de conversa alcanzando os 1000 e que un 30% do
profesorado teña o nivel C1 nunha lingua estranxeira. Na miña opinión, esta
proposta está moi ben e obviamente pódese conseguir, pero non en dous anos, xa
que se necesita un período máis longo de adaptación. Un proxecto desta envergadura
non se leva a cabo da noite á mañá. Polo tanto, penso que é moi pouco realista
e demasiado ambicioso para que se estableza por completo dentro de dous anos. Ademais,
con respecto ao orzamento, 70 millóns de euros da para moito, pero a cuestión é
que estes cartos estean ben invertidos nos recursos adecuados e que sexa
efectivo.
Outro dos aspectos máis importantes a destacar e que vexo persoalmente máis
imposible de conseguir é a formación do profesorado. A Xunta creará un plan de
formación específico sobre linguas estranxeiras para que os docentes galegos
poidan lograr un C1 nunha lingua estranxeira. Este plan penso que é bastante
difícil sobre todo para os docentes que xa pasaron a súa etapa de formación e
na súa época estudaron para ser competentes na materia que eles mesmos imparten
e non para ter un bo nivel nunha lingua estranxeira. Este tipo de profesorado
que non é bilingüe nin nativo nin ten relación con outra lingua diferente á
materna dificilmente vai poder chegar dun nivel A2 básico a un nivel avanzado C1,
penso que é practicamente imposible ou soamente o conseguirá un porcentaxe moi
pequeno de docentes. Para conseguir este obxectivo haberá que reciclar o
profesorado, adaptar novas metodoloxías na aula, ampliar os coñecementos, aprender
a traballar constantemente coas TIC, etc., tendo unha formación constante. Polo
tanto, creo que non se conseguirá até que pasen uns anos e as novas xeracións máis
preparadas cheguen a ser docentes.
Algo parecido pasa tamén co alumnado, xa que se establecerán procedementos
para certificar ao alumnado dos centros plurilingües ao final de cada etapa,
mediante a EOI ou entidades estranxeiras. Ademais, a Xunta ten como obxectivo
que un 30% dos estudantes da ESO certifiquen un nivel B1 e que outro 30% dos de
Bacharelato certifiquen un nivel B2. Na miña opinión é un paso moi grande xa
que isto é un proceso que non se consegue con arte de maxia. Hai que lembrarse
de que nestes momentos, o alumnado de Bacharelato remata soamente cun nivel A2,
polo que sería saltar dous niveis en soamente dous anos. Isto será algo que se
conseguirá seguramente cos anos, pero non nun futuro inmediato. Ademais, tamén
hai que ter en conta que hai persoas ás que non se lle dan ben os idiomas ou
non lle gusta estudar outras linguas máis que a súa propia, polo tanto, con
este proxecto haberá estudantes que teñan moitas dificultades nas materias que
se impartan nunha lingua estranxeira.
A todo isto hai que engadir que España é un país que ten unha ideoloxía
monolingüe dende o franquismo e, aínda que a metodoloxía CLIL foi un éxito en
algúns países de Europa, isto non quere dicir que o sexa aquí tamén, xa que nos
países que se experimentou esta metodoloxía xa se utilizaba o inglés, por
exemplo, como segunda lingua ao ter un idioma materno pouco común.
En conclusión, soamente nos quedará esperar uns anos para ver se este
proxecto tan ambicioso que creou a Xunta ten bos resultados ou non e se a
metodoloxía CLIL funciona en Galicia tan ben coma noutros países, xa que, se
funcionase, sería dar un paso adiante coas linguas estranxeiras.
