Tema 3. Aprendizaxe por proxectos co libro de texto como punto de partida

A ensinanza de linguas estranxeiras nas escolas está comezando a cambiar a súa metodoloxía. O que coñecemos como clases maxistrais, onde o docente é o centro da experiencia educativa e da materia mentres que o alumnado simplemente escoita e aprende do que di o profesor, está dando paso ao método de aprendizaxe por proxectos. Este tipo de aprendizaxe é unha metodoloxía de adquisición de coñecemento e competencias mediante a elaboración de proxectos que dan resposta aos problemas ou retos da vida cotiá e converte aos alumnos e alumnas en protagonistas da súa propia aprendizaxe. Así pois, o que se pretende con esta metodoloxía é dotar ao alumnado de toda unha serie de estratexias e ferramentas para resolver problemas. Ademais, considerase que ese tipo de aprendizaxe é o que realmente lles fará competentes, xa que é máis práctico, motivador e interactivo que memorizar leccións ou informacións, desenvolve a súa autonomía, fomenta o seu espírito autocrítico, promove a creatividade...

A idea que escollín ten como punto de partida o libro de texto Tous ensemble! para 2º da ESO cun nivel A1-A2. A unidade do libro coa que se vai traballar está relacionada cos alimentos e expresar os gustos. No libro, na parte de léxico, hai uns debuxos con moito vocabulario sobre alimentos e as únicas actividades que hai son un exercicio de por os produtos indicados na súa caixa correspondente segundo a tenda onde se compran, e outro de atopar e rodear os alimentos nunha especie de serpente con moitas letras; na parte de gramática desenvólvense actividades sobre os artigos partitivos para usar coa comida e os verbo manger e acheter. Eu o que faría sería organizar un pícnic real entre todo o alumnado da clase, onde por grupos na clase deberán falar sobre os seus gustos e o que comen a miúdo. A raíz de aí, deberán elixir os alimentos que queren comprar para levar ao pícnic.

Nunha WebQuest, proporáselle unha actividade real ao alumnado: facer un pícnic real. Para iso, primeiro terán que facer grupos de 4, xa que son un total de 12 estudantes. Cando estean os grupos feitos, cada alumno individualmente expresará en francés ao resto do grupo os alimentos que lle gustan e os que non e o que comen habitualmente coas frases fixas anteriormente vistas. Un de cada grupo deberá ir apuntando as frases que se din sobre os gustos para despois entre todos poñerse de acordo sobre os alimentos que queren levar ao pícnic (María aime le chocolat, Pablo n’aime pas les légumes...) Despois, proporcionaráselle un folleto en liña dun supermercado e deberán facer unha lista da compra cos alimentos que elixiron en clase poñéndose de acordo co que van querer comprar e o que non. Cando cheguen a un acordo, deberán formar frases cos produtos que van comprar engadindo obrigatoriamente o verbo acheter e os partitivos (Nous achetons du fromage, nous achetons des biscuits...) e terán que engadir o prezo de cada produto. Ao final, cada grupo deberá expoñer en francés ao resto da clase o que lle gusta a cada un, a lista da compra que elixiron e o prezo final de todo. Cando acaben todos de expoñer a súa comprar, entre todos elixirán a que máis lle guste a todos con posibilidade dalgún cambio. Este proxecto terá unha duración de 3 sesións.

A avaliación farase mediante unha rúbrica. Nesta teranse en conta o contido, o uso de partitivos, a preparación do traballo e a expresión oral, e cualificarase cada un deses apartados do 1 ao 5. Será unha nota conxunta para todo o grupo excepto a expresión oral que se avaliará individualmente. Con respecto ao contido, a información deberá estar ben relacionada e ben organizada (mencionar os gustos de cada estudante sobre os alimentos, os produtos que se van comprar finalmente e os prezos destes). A formación dos partitivos deberá facerse sen case erros mostrando haber entendido o proceso. Con respecto á preparación, o traballo feito deberá mostrar que se fixo con interese e esforzo tendo coherencia interna e claridade. Por último, na expresión oral valorarase a utilización do vocabulario, a gramática e a facilidade e a claridade coa que se expresan.

En conclusión, con esta actividade baseada na metodoloxía por proxectos, o alumnado adquire competencias tanto xerais como comunicativas, xa que desenvolven habilidades e competencias como a colaboración, comunicación, toma de decisións... ademais de algo moi importante nas linguas estranxeiras: a comunicación oral e escrita. Con esta actividade, as competencias que máis se pretenden desenvolver son as lingüísticas e comunicativas, xa que grazas a elas o alumnado ten a habilidade de utilizar a linguaxe, expresando e interpretando conceptos e opinións por medio de discursos orais e escritos, así como interactuar lingüisticamente en tódolos contextos e espazos sociais.

Referencias:

Gauthier, J., Parodi, L. e Vallacco, M., Tous ensemble! 2: Livre de l'élève. Vicens Vives.